દાહોદ પોલીસે ડ્રોનનો ઉપયોગ કરીને કેવી રીતે ‘ચોર’ પકડ્યો, શું છે આ ટેક્નોલોજી?

આરોપીને પકડવામાં ઉપયોગમાં લેવાયેલી ડ્રોન ટેક્નોલોજીમાં થર્મલ સ્ક્રિનિંગ શું છે તે અંગે વાત કરતાં દાહોદના પોલીસ સુપ્રિટેન્ડેન્ટ ડૉ. રાજદીપ ઝાલાએ વાત કરતા જણાવ્યું હતું કે, “થર્મલ સ્ક્રિનિંગમાં કૅમેરા હોય છે. જે ડ્રોનમાં ઇનબિલ્ટ આવતી ટેક્નોલોજી છે. આ ટેક્નોલોજીમાં ઓબ્જેક્ટના તાપમાનના આધારે થર્મલ કૅમેરા ઇમેજ ક્રિએટ કરે છે. ઝાડ, પશુ પક્ષી મનુષ્ય દરેકના શરીરનું અલગ અલગ તાપમાન હોય છે.”

તેઓ સમજાવતા કહે છે, “એક ચોક્કસ ઊંચાઈ પર ડ્રોન ઉડાડી નીચેની ઇમેજ કૅપ્ચર કરવામાં આવે છે. ઝાડ, પશુ-પક્ષી તેમજ મનુષ્ય દરેક ઓબ્જેક્ટના તેના તાપમાનના આધારે અલગ-અલગ ડાર્કનેસ અને કલર કૉડિંગ બને છે. આ કલર કોડિંગના આધારે તે ઓબ્જેક્ટ માણસ, ઝાડ કે પ્રાણી હોવાની ઓળખ થાય છે.”

તેમણે ઉમેર્યું હતું, “આ ટેક્નોલોજીની ખાસ વાત એ છે કે કોઈ આરોપી જંગલમાં ઝાડ કે ઝાડી નીચે છુપાયો હોય તો પણ તેને થર્મલ ઇમેજની મદદથી પકડી શકાય છે. આ પ્રકારે છુપાયેલા આરોપીને ઝાડના તાપમાનને આધારે ઝાડની ઇમેજ અને તેની નીચે છુપાયેલા માણસના શરીરના તાપમાનને આધારે કૅમેરામાં તેની અલગ કલરની ઇમેજ બને છે. ટેક્નોલોજીની મદદથી સરળતાથી તેને શોધી શકાય છે.”

તેમણે જણાવ્યું હતું કે, “અમે ઓગસ્ટ, 2023થી ડ્રોનનો પેટ્રોલિંગ માટે અને આરોપીઓને પકડવા માટે ઉપયોગ કરીએ છીએ. ફર્સ્ટ જનરેશન અને સેકન્ડ જનરેશનના ડ્રોનની અંદર નાઇટ વિઝન, થર્મલ સ્ક્રિનિંગ તેમજ ઇન્ફ્રારેડ ટેક્નોલોજી ઇનબિલ્ટ જ હોય છે.અમારા વિભાગ દ્વારા જે ડ્રોનનો ઉપયોગ કરવામાં આવે છે તે 30x ઝૂમવાળું છે. બહુ ઊંચાઈ પરથી ઝૂમ કરીને પણ ઓબ્જેક્ટને જોઈ શકાય છે. તેમજ અમે ફૉક્સ લાઇટ પણ લગાવી છે.”