ઉત્તર મલેશિયામાં સોમવારે એક ભયાનક બસ અકસ્માતમાં 15 લોકોએ જીવ ગુમાવ્યો, જેમાં મોટાભાગે યુનિવર્સિટીના વિદ્યાર્થી હતાં. આ દુર્ઘટના ત્યારે બની, જ્યારે એક બસ યુનિવર્સિટીના વિદ્યાર્થીઓને લઈ જઈ રહી હતી અને તેની મિનિવેન સાથે ટક્કર થઈ હતી.
પોલીસ અને રેસ્ક્યૂ ટીમ મુજબ, આ દુર્ઘટનાસ્થળ થાઈ બોર્ડર પાસે આવેલા વ્યસ્ત ઇસ્ટ-વેસ્ટ હાઈવે પર થયું હતું. દુર્ઘટના એટલી ગંભીર હતી કે 13 લોકોએ ઘટનાસ્થળે જ જીવ ગુમાવ્યો અને બાકી બેનું સારવાર દરમ્યાન હોસ્પિટલમાં મોત થયું.
આકસ્મિક ટક્કર એટલી ઘાતક હતી કે બસ દક્ષિણ બાજુ પલટી ગઈ અને તેનું પાછળનું ભાગ સંપૂર્ણ તૂટી ગયું. મિનિવેન રસ્તાની બાજુના ખાડામાં ફસાઈ ગઈ હતી. ફાયર એન્ડ રેસ્ક્યૂ વિભાગના જણાવ્યા મુજબ બસે નિયંત્રણ ગુમાવ્યું હોવાની શક્યતા છે, જેના કારણે પાછળથી મિનિવેનને ટક્કર મારી હતી.
ઘટનાસ્થળ પર હાજર લોકો માટે દૃશ્ય ખૂબ જ ભયાનક હતું. કેટલાક પીડિતો પોતાની જાતે બહાર નીકળી આવ્યા, તો કેટલાક ટક્કરની તીવ્રતા કારણે બહાર ફેંકાઈ ગયા. ઘણાં લોકો બસમાં જ ફસાઈ ગયા, જેને રેસ્ક્યૂ કર્મચારીઓએ હાઇડ્રોલિક કટર વડે કાપી કાઢ્યા.
મૃતકોમાં 14 વિદ્યાર્થી સુલતાન ઇદ્રિસ એજ્યુકેશન યુનિવર્સિટીના હોવાનું પુષ્ટિ થયું છે, જ્યારે 15મો મૃતક બસનો સહાયક હતો.
આ દુર્ઘટનામાં કુલ 33 લોકો ઘાયલ થયા છે, જેમાંથી 7ની સ્થિતિ ખૂબ ગંભીર છે. જણાવી દઈએ કે પીડિત વિદ્યાર્થીઓની ઉંમર મુખ્યત્વે 21 થી 23 વર્ષની વચ્ચે હતી અને તેઓ ઉત્તરપૂર્વી મલેશિયાના જેર્ટેહ શહેરથી પ્રવાસે નીકળ્યા હતા.
આ અકસ્માત માત્ર દુર્ભાગ્યપૂર્ણ જ નહીં પણ મલેશિયાની જોખમી સડકો પર છેલ્લાં દાયકાનું એક સૌથી ઘાતક ઘટનાક્રમ ગણાય છે.
