સુરતના માથાભારે આરીફ મીંડીના પુત્રની ધરપકડ ,દુબઈથી ગોલ્ડ સ્મગલીંગનો ઘટસ્ફોટ
અફઘાનિસ્તાન, બાંગ્લાદેશ અને ચીનથી આવતા હવાલાના કરોડો રૂપિયાને ક્રિપ્ટોમાં કન્વર્ટ કરીને હેરફેર કરનાર આંતરરાષ્ટ્રીય રેકેટનો સુરત સ્પેશિયલ ઓપરેશન ગ્રુપ દ્વારા પર્દાફાશ કરવામાં આવ્યો છે. આ કૌભાંડના મુખ્ય સૂત્રધાર પિતા-પુત્રની સ્પેશિયલ ટીમે ધરપકડ કરી લીધી હતી. જેમાં આજે માથાભારે મીંડી ગેંગના આરીફ મીંડીના પુત્ર ઉહેદ આરીફ મીંડી શેખની ધરપકડ કરવામાં આવી છે. સુરત શહેર એસ.ઓ.જી. એ ગોરાટ રોડના સોહેબ નવસારીવાલાને પણ બોલાવ્યો છે. વેપારી સોહેબ ઉર્ફે સોહેબ ગામટી નવસારીવાલાની એસ.ઓ.જી. દ્વારા પૂછપરછ કરવામાં આવી.
આરોપી પિતા-પુત્ર પાસેથી ૪૯૭ સિમકાર્ડ મળ્યાં હતા, જેનો ઉપયોગ દેશભરમાં ૨૮ જેટલા સાયબર ફ્રોડના કિસ્સામાં થયો છે. બે વર્ષમાં હવાલાના ૧૦૦ કરોડ રૂપિયાનાં ટ્રાન્ઝેક્શન મળ્યાં છે, જોકે આ હવાલાની રકમનો ઉપયોગ ટેરર ફંડિંગમાં કરાતો હતો કે નહીં એ અંગેની પણ તપાસ હાથ ધરવામાં આવી છે. આરોપીઓ પાસે દુબઈમાં ૩ બી.એચ.કે. ફ્લેટ અને મોબાઈલ સ્પેરપાર્ટ કંપનીની દુકાન પણ છે. થોડા દિવસ પહેલાં પત્નીના નામે નવસારીમાં ફાર્મહાઉસ પણ ખરીદ્યું છે.
ઓનલાઇન ટ્રાવેલ ટિકિટ બુકિંગના નામે હવાલાના પૈસાની હેરફેર કરતા
સુરત શહેરના ગરીબ અને જરૂરિયાતમંદ લોકોનાં નામે એકાઉન્ટ ખોલાવી તેમાં ઠગાઈ, જુગારના પૈસા ટ્રાન્સફર કરી એ પૈસાને ક્રિપ્ટોમાં કન્વર્ટ કરીને હેરફેર કરતા આરોપીઓ મકબુલ ડૉક્ટર અને તેના પુત્ર કાસિફ ડૉક્ટર અને માઝ નાડાને પકડી પાડવામાં આવ્યા હતા. આરોપીઓએ મોટા વરાછામાં ઓનલાઇન વેપારના નામે આ ગોરખધંધો શરૂ કર્યો હતો. આ ગોરખધંધો કરતા સોની ફળિયા સિંધીવાડમાં રહેતા પિતા-પુત્ર સહિત ત્રણ લોકોની સ્પેશિયલ ઓપરેશન ગ્રુપે ધરપકડ કરી હતી. પિતા મકબુલ ડોક્ટર અને તેના બંને પુત્રો ઓનલાઇન ટ્રાવેલ ટિકિટ બુકિંગના નામે હવાલાનાં નાણાં સગેવગે કરવાનું રેકેટ ચલાવી રહ્યા હતા. આ અંગે માહિતી મળતાં સ્પેશિયલ ઓપરેશન ગ્રુપે પિતા-પુત્રની ગતિવિધિ પર સતત વોચ રાખી હતી અને આખરે તેમના ગોરખધંધા અંગે પૂરતી માહિતી મેળવી તેમની ધરપકડ કરી હતી.
સ્પેશિયલ ઓપરેશન ગ્રુપે રેડ કરી આરોપીઓની ધરપકડ કરી
સુરતમાં રહી વિદેશમાં રહેતા આંતરરાષ્ટ્રીય ચીટરોના વોલેટમાં પિતા-પુત્ર ઠગાઈ, જુગારનાં નાણાં હવાલાથી મેળવી એને ક્રિપ્ટોમાં કન્વર્ટ કરી મોકલતા હતા. સ્પેશિયલ ઓપરેશન ગ્રુપે સિંધીવાડમાં આવેલી સફિયા મંઝિલમાં રેડ કરી હતી. ગ્રાઉન્ડ ફ્લોર પર પિતા-પુત્ર ટિકિટ બુકિંગની ઓફિસ ચલાવતા હતા, જ્યારે ઉપરના માળે રહેતા હતા તેમના ઘરે પણ પોલીસે તપાસ હાથ ધરી હતી અને ત્યાંથી આરોપી મકબુલ ડોક્ટર અને તેનો પુત્ર કાશિફ મકબુલ ડોક્ટર તેમજ માજ અબ્દુલ રહીમ નાડાની ધરપકડ કરી હતી.
૧૭ લાખથી વધુનો મુદ્દામાલ કબજે કર્યો
સ્પેશિયલ ઓપરેશન ગ્રુપે જ્યારે આ ત્રણેય આરોપીની પૂછપરછ હાથ ધરી ત્યારે તેમની પાસેથી ૨૯ ચેકબુક, ૮ પાસબુક, અલગ-અલગ બેન્કનાં ૩૮ ડેબિટકાર્ડ, ૪૯૭ જેટલાં સિમકાર્ડ અને ૭ મોબાઈલ ફોન મળ્યાં હતા. ફક્ત એટલું જ નહીં, આરોપીઓ પાસેથી પૈસા ગણવાનાં બે મશીન અને અલગ-અલગ દેશની કરન્સી પણ મળી છે. આરોપીઓના ઘરમાંથી ૧૭ લાખ રૂપિયા સ્પેશિયલ ઓપરેશન ગ્રુપે કબજે કર્યા છે.
ડમી એકાઉન્ટ થકી કરોડો પડાવી લેવાય છે
ડોક્ટર પિતા-પુત્રની કરેલી તપાસમાં હવાલાના પૈસાને ક્રિપ્ટોમાં કન્વર્ટ કરતા આંતરરાષ્ટ્રીય રેકેટનો પર્દાફાશ થયો હતો. ડોક્ટરે એવી કબૂલાત કરી હતી કે તેની પાસે આંગડિયા મારફત રોકડા રૂપિયા દુબઈથી આવતા હતા, જેને મહેશ દેસાઈ દ્વારા મોકલવામાં આવતા હતા. ઓનલાઈન ફ્રોડ, સટ્ટા અને ગેમિંગ થકી સાયબર ક્રિમિનલ્સ દ્વારા કરોડો રૂપિયા ડમી એકાઉન્ટ થકી પડાવી લેવાય છે. આ ડમી એકાઉન્ટમાંથી તરત નાણાં વિડ્રો કરી લેવાય છે. અફઘાનિસ્તાન, ચીન અને બાંગ્લાદેશમાં બેસી આ રેકેટ ચલાવનારાં તત્ત્વો કરોડો રૂપિયા હવાલા મારફત મોકલતા હતા.
દુબઈમાં બેસીને નેટવર્ક મહેશ ચલાવે છે
આ રૂપિયા પિતા-પુત્ર ભાડે લીધેલાં કરંટ એકાઉન્ટમાં જમા કરાવતા હતા. ત્યાર બાદ એ એકાઉન્ટમાંથી તરત ક્રિપ્ટો ખરીદી લેવામાં આવતા હતા. આ રીતે રોકડને ક્રિપ્ટોમાં કન્વર્ટ કરી દેવાય છે. આ ક્રિપ્ટો હવાલાથી આંગડિયા મારફત નાણાં મોકલનારી વ્યક્તિના કહેવા અનુસાર વોલેટમાં ટ્રાન્સફર કરી દેવામાં આવે છે. તપાસ દરમિયાન આ રેકેટમાં ઝાંપાબજારનો મુર્તુઝા ફારુક શેખ અને અમદાવાદનો મહેશ દેસાઈ પણ સામેલ હોવાનું બહાર આવતાં તેમની શોધખોળ હાથ ધરાઈ હોવાનું જાણવા મળ્યું છે.
બે વર્ષમાં ૧૦૦ કરોડનાં ટ્રાન્ઝેક્શન મળ્યાં છે
આ સમગ્ર મામલે પોલીસ કમિશનર અનુપમસિંહ ગેહલોતે જણાવ્યું હતું કે દુબઈમાં બેસેલો મહેશ સુરતના મકબુલને રોકડ રૂપિયા ક્રિપ્ટોમાં કન્વર્ટ કરવા માટે મોકલતો હતો, જેને કન્વર્ટ કરવા માટે મકબુલ ૧૦% કમિશન લેતો હતો. હાલ તપાસમાં જાણવા મળ્યું છે કે બે વર્ષથી આ લોકો હવાલાના કરોડો રૂપિયા કન્વર્ટ કરી રહ્યા હતા. બે વર્ષ દરમિયાન ૧૦૦ કરોડ રૂપિયાનાં ટ્રાન્ઝેક્શન મળ્યાં છે. છેલ્લા થોડા દિવસોમાં તો એક કરોડથી પણ વધુ રૂપિયાના ટ્રાન્ઝેક્શન થયાં છે. આરોપી મકબુલના ચાઇના એગ્રિકલ્ચર બેન્ક અને દુબઈની બેન્કમાં એકાઉન્ટ છે. કેન્દ્રીય એજન્સીઓને અંગે પણ ટૂંક સમયમાં જાહેરાત થશે. દુબઈમાં જ્યારે મકબુલ વેપાર કરવા માટે ગયો હતો ત્યારે તેની ઓળખ મહેશ સાથે થઈ હતી.
સિમના ઉપયોગથી દેશભરમાં ૨૮ સાયબર ફ્રોડ નોંધાયા
તેમણે વધુમાં જણાવ્યું હતું કે રૂપિયાને ક્રિપ્ટો કરન્સીમાં અને ક્રિપ્ટોને ફરી રૂપિયામાં કન્વર્ટ કરવાનો આ ખેલ હતો. આ ઘટનામાં ૪૯૭ જેટલાં સિમકાર્ડ મળતાં આટલી મોટી સંખ્યામાં સિમકાર્ડ ક્યાંથી આવ્યાં? એ અંગેની તપાસ કરવામાં આવશે. આ સિમકાર્ડ થકી દેશનાં અલગ- અલગ રાજ્યોમાં ૨૮ જેટલા સાઈબર ફ્રોડ કરવામાં આવ્યા છે.
સિમકાર્ડ દુબઈ મોકલી દર મહિને ૭-૮ લાખની કમાણી કરતા હતા
આ સાથે તેમણે જણાવ્યું હતું કે આરોપીઓ એક કંપનીના સીમકાર્ડ મેળવીને દુબઈ મોકલતા, એક મહિનામાં આ રીતે સીમકાર્ડ વેચીને ૭-૮ લાખ રૂપિયા કમાતા હોવાનું હાલ પ્રાથમિક તપાસમાં જાણવા મળ્યું છે. અત્યાર સુધીમાં જેટલી આંગડિયા પેઢી મારફત પૈસા ટ્રાન્સફર કરાયા હતા. જોકે આ પૈસાનો ઉપયોગ ટેરર ફંડિંગમાં કરાતો હતો કે નહીં એ અંગે પોલીસ તપાસ કરશે.
